News & Events

आदिकवि भानुभक्त क्याम्पसको शिक्षाशास्त्र विभाग र क्याम्पसमा गणित विषय अध्ययनरत विद्यार्थीहरूको साझा संस्था एविसि गणित विद्यार्थी सर्कलको संयुक्त आयोजनामा आज २०८१ असार १ गते क्याम्पस सभा कक्षमा आयोजना भएको गणितको शैक्षिक सामग्री निर्माण कार्यशाला सम्पन्न भएको छ। कार्यशालाको क्याम्पस सञ्चालक समितिका पूर्व अध्यक्ष एवं जिल्ला समन्वय समिति तनहुँका प्रमुख शान्तिरमण वाग्लेले उद्घाटन गर्नुभएको थियो । उद्घाटन सत्रमा बोल्दै प्रमुख अतिथि वाग्लेले नेपालका विश्वविद्यालय र क्याम्पसहरूमा गणित विषयको अध्ययन गर्ने विद्यार्थीहरूको घट्दो संख्याले गणित विषय शिक्षकको जनशक्तिको निकट भविष्यमा हुने चरम अभावलाई संकेत गर्ने बताउँदै क्याम्पसले विद्यालय स्तरमा गणितको अध्ययनलाई सहज र गुणस्तरीय बनाउन आफ्नो विद्यार्थीहरूका माझ महत्त्वका साथ तालिमका कार्यक्रमहरू अगाडि ल्याउनुपर्ने र क्याम्पसले आफ्ना गणित विषयका विद्यार्थीहरूलाई आयोजना गरेको र भविष्यमा गर्ने यस्ता तालिमले भावीदिनहरूमा गणितका शिक्षक उत्पादन गर्ने र समुदायमा गणित विषयको अध्ययनमा आकर्षण थप्ने बताउनुभएको थियो।

कार्याशालाको समापन कार्यक्रममा व्यास नगर उपप्रमुख ईन्दिरा दरैले सहभागीहरुलाई प्रमाणपत्र वितरण गर्दै नगरको शिक्षामा रुपान्तरण ल्याउन क्याम्पस र नगर विच सहकार्य जरुरी रहेको बताउनु भएको थियो।

कार्यक्रममा बोल्दै क्याम्पस सञ्चालक समितिका उपाध्यक्ष खर सिं दरैले विद्यार्थीहरूको ज्ञान सिप क्षमता अभिवृद्धिका लागि क्याम्पस सञ्चालक समितिले स्रोत व्यवस्थापनलाई प्राथमिकतामा राखेको बताउनुभएको थियो। कार्यक्रममा क्याम्पस प्रमुख महाप्रसाद हडखले र स्वतन्त्र विद्यार्थी युनियनका सचिव अनुप आलेले शुभकामना मन्तव्य राख्नुभएको थियो।